விழித்துக்கொள்

உனக்கான பசி - நீ 

 உண்டால் தான் தீரும் 

உனக்கான துயர்  - உன்னால் மட்டுமே 

  உள்ளுணர முடியும்  . . . 

துடைக்க கரங்கள் மறந்தபோது 

 துளி துளியாய் கண்ணீர் எதற்கு . . .?

மூச்சடக்க முடிந்த மட்டும் - உனை 

  மூழ்காமல் காக்க நினைப்பர் 

மூச்சவர்க்கு தேவையெனில் - உன் 

  மேல் தூக்கி கால் வைப்பர் . . .

அன்பு, பாசம், காதல்

  பயிரிட்டது பலனுக்காகவே . . .

கஞ்சி, காசு, காமம் 

  அறுவடையில் நீ அறிவாய் ! 

அன்பை அள்ளிக் கொடுத்தாயின் 

  அடிமையென நகைப்பர் . . .

பாசம் வைத்தாயின் உன்னை 

  பணிய வைத்து அழகு பார்ப்பர் . . . 

எரிக்கப்பட்ட தீக்குச்சிகள் - தூர

  எறியபட்டவையே அன்றி ஏற்கப்பட்டதன்று !

பற்றவைக்கும் வரை மட்டுமே - நீ 

  பந்தமாய் இருப்பாய்

பற்றியதும் விரலுக்கும் - நீ

  பாரமென ஆவாய் !

உலக நியதியை உன்னிப்பாக 

 எண்ணிப் பார்

நல்லவன் வீழ்த்தப்படுவான்

  வல்லவனே வாழ்தப்படுவான் !

நிழலும் உன்னோடு 
  நிஜமாய் நடைபோடுவதில்லை . . .

வெளிச்சம் விளக்கில் இல்லையேல் 

  வெற்றிடம் மட்டுமே உன்னோடு அங்கே !

எண்ணிக்கொள் ,

வாழ வக்கத்து வாழ்பவனுக்கு 

  வானளவு வாய்ப்புகளும் சிறு வைக்கோல் பதர் தான் . . .    

வாழ்வில் வாஞ்சை கொண்டு போராடி பார் - சிறு 
  வைக்கோலும் உனக்கு வாள் போல் நிற்கும். . . 

உனக்கான பலமோ,பலவீனமோ

  உன்னால் வகுக்கப்பட்டதே !

உனக்கான எல்லாம் 

  உன்னால் உருவானதே !

விடியும் வரை விழித்திரு - முடியாவிடில் 

   உறங்குவதை நிறுத்திடு . . . 

முதலிரவு . . .

                                       

இனம் புரியா ஓர் இன்பம் 

    இமைகள் மூடாமல் பல கனவு . . .

மூச்சிலே ஏற்ற இறக்கம் 

    முகத்திலோ  புதுப்புது மாற்றம் . . . 

தூக்கமில்லா இந்த இரவு 

    துடிதுடித்தது உள்ளுணர்வு  . . .

 படபடத்த இதயம்  - பாடி 

    பறந்த என் இளமை  . . .

வறண்டு போன உதடுகள்
   வார்த்தை குழறும் நாவு . . . 

முத்து முத்தாய் வியர்வை 

      முதன் முதலாய் புது அனுபவம்  . . .

இப்படித்தான் நகர்ந்தது

முதல் வேலை கிடைத்த அந்த முதல் இரவு  . , . , !

நிலை

                             

காதல் ததும்ப கடவுளை வேண்டி 

       கையில் கட்டினால் கயிறொன்றை , காதலி  . . . 

கயிறின் நிறம் மாறவில்லை   - அவள்

        காதல் மனம் மாறியும்  . . 

 தற்போது என் காதல், ஒற்றை கயிறோடு மட்டுமே  . . .

மற(மாய்)ந்து விடுகிறேன் ! !

             

சொன்னது நீதானே !

                         அற்றைத் திங்கள் , அழகிய நன்நாள்    

                                      அருகில் அமர்ந்து அழகாக சிரித்து, 

                         வெட்கி நாணி வேறு பக்கம் பார்த்து 

                                       எச்சில் விழுங்கி எதார்த்தம் விடுத்து,  

                         வியர்வை நனைக்க விரல்களை பிசைந்து 

                                       படபட வார்த்தைகளாய் பயந்தவாறு 

             "உன்னை காதலிக்கிறேன்" என்று 

சொன்னது நீதானே !

                         பெற்றோர் மறுத்தாலும் 

                                      உற்றோர்  எதிர்த்தாலும் ,

                          உனையன்றி யாரையும் 

                                      எள்ளளவும் நினையேன் !

சொன்னது நீதானே !

                          மற்றவர் போல் அல்ல  - உற்ற 

                                      உனை நான் நினைப்பது, 

                          மற்றது போல் அல்ல -  உயிர் 

                                       உருக உனை காதல் செய்வது !

சொன்னது நீதானே !

        

                          காலைக் கதிரவன் 

                                       நீயாக வேண்டும் ,

                          மாலை மதியுமாய்  நீ 

                                        மட்டுமே வேண்டும் ! 

                          நாளின் முதன்முதல்

                                        நான் காணும் உலகம்

                          உன்முகம் தனிலே 

                                       தொடங்கிட வேண்டும் !

                          நாழிகை முடியும் நேரமும்
                    அருகில்  - உன் 

                           முகம் கொண்டு இமை 
                    மூடிட வேண்டும் !

சொன்னது நீதானே !

                         ஒரு நாள் உன் குரலில் 

                                    நனையாமல் நகர்ந்தால், 

                          மறு நாள் என் மனம் 

                                   மழையரியா பாலையாய் !

சொன்னது நீதானே !

       

                         உன்பெயர் கொண்ட 

                                    குழந்தைகள் கண்டால் 

                          என் இதழ் குவியும்

                                    கன்னங்கள் மேலே !

                         உனை போல் யாரேனும்

                                   நகர்ந்திட கண்டால் 

                        என் இதழ் விரியும்

                                    உன் எண்ணங்களாலே !

சொன்னது நீதானே !

                        இத்தனையும் கூறிய உன் உதடுகள்  

                        இத்தனை கூரிய சொல்லை எப்படி

 சொல்லத் துணிந்தது  ! ?   "மறந்து விடு . . ."

                        உள்ளிருந்து வந்த வார்த்தைகள் 

                                 உண்மையெனில் . . .

                        உன் உதடு வேறு பெயரை 

                                 உச்சரிக்குமெனில் . . .

                       என்கை விடுத்து உன்னால் 

                                நடைபோட முடியுமெனில்  . . .

                      என் குரல் கேட்க நீ 

                              தேவையில்லை எனில் . . . 

                     உற்றவராயன்றி  மற்றவராய் 

                             எனை எண்ணினாய் எனில் . . . 

மறந்து விடுகிறேன் . . .

         உன்னையும் உன் மேல் கொண்ட காதலையும் அல்ல

                          உன்னோடு சேர்ந்து வாழ முடியா இவ்வுலகை  . . . 

மறந்து விடுகிறேன்  . . .

ம(தி) , மாது மது !

மது என்ற ஒன்று மட்டும் இல்லையென்றால், - மாதுக்கள் 

மாற்றத்தால் மனமுடைந்த  - மாந்தர்க்கு 

மருந்தே  இல்லாமல் போயிருக்கும் உலகில் ! ! 

கண்ணீர் அஞ்சலி !

                          

அன்புள்ள அம்மா , அப்பா  ! 

ஆருயிர் நண்பா !

மதிப்பிற்குரிய மாமா ! 

மரியாதைக்குரிய மாப்பிள்ளை !

என் உயிர் காதலியே ! 

என்றும் இனிய காதலா !

மடிந்து போன வாக்கியங்களை - அந்நாளில்

மடியில் சுமந்த கடிதங்களே . . . !

உணர்ச்சிகள் ஊட்டிய வரிகளும்

கனவுகள் கடத்திய காகிதமும்,

அறிவியல் ஆ(தீ)க்கத்தால்

அழிந்து போன உணர்வுகள் போல,

காணாமல் போன என் 
 இனிய கடிதமே உனக்கு  
கண்ணீருடன் அஞ்சலி . . .

எம்மண் மாண்டதும் , மீண்டதும் ! ! !

                                 

                                      எம்மண் மாண்டதும் , மீண்டதும் ! !

அணு  பிளந்து,  அண்டம் வளர்ந்து 

          கண்டம் பிரிந்து,  கருவாய்மாறி

கால மாற்றத்தால் கழனியோடு உருவான 

          கடவுளின் குழந்தை எம்பாரதமே . . . 

அனைதுலகுக்கும் அறிவியல் புகட்டி 

            அர்த்தசாஸ்திரம் முறையாய் இயற்றி 

ஆள்வதெற்கென்றெ பிறந்த நாம்  - எப்படி 

           ஆனோம் அடிமையாய்., ?

விற்க வந்தவன் விலை பேசிட  - விற்று 

         விட்டோம் நம் மண்ணை 

விலை போனது நம் அன்னை . . .

ஒண்ட வந்த பிடாரியொன்று ஊர்

          பிடாரியை விரட்டிய கதை 

டச்சுகளும் , தானிஷ் களும் 

       பிரெஞ்சுகளும், பிரிட்டிஷ்களும்

பிணம் திண்ணி கழுகுகளாய் 

       பிரித்தெடுத்தனர் எம்மண்ணை  . . . 

காற்றுக்குக் கப்பம் கட்டினோம் 

        கஞ்சி குடிக்க வரி கட்டினோம்,

காதலன் காதலியை பார்க்க ,

        கட்டிலில் கணவனோடு படுக்க,

குழந்தைகள் கூடி விளையாட 

        குலப்பெண்கள் மஞ்சள் நீராட,

அனுமதி வேண்டி நின்றோம்  - ஆம்  

         அடிமையாய் வாழ்ந்து வந்தோம் ! ! 

அறத்திற்கு பேர் போனோம் 

         ஆக்கத்திற்கு பேர் போனோம்,

வீரத்திற்கு பேர் போனோம் 

         விருந்தோம்பலுக்கும்  பேர் போனோம் 

அத்தனை உணர்வுகள் இருந்தும் ஏனோ 

         பயனின்றி வீணாய் போனோம் . . . 

காயம்பட்ட கத்திகள் எத்தனை ,

        கணவன் இழந்த மனைவிகள் எத்தனை  - ஒற்றை 

குமாரனை ஒளித்து வைக்காமல் 

        போருக்கு அனுப்பிய பெண்கள் எத்தனை . . . 

வெள்ளையனே ,

கத்திக்கு கத்தி என்றால் எங்கள்முன் 

காய்ந்து போன எள்ளடா நீ ,

கருவில் பெற்ற பயிற்சி  போதும் - 

      உங்கள்  கரு அறுத்து கழுகுக்கு போட . . . 

தூர இருந்து தூக்கி எறிந்த தோட்டாவும் 

        பொசுங்கி வந்து பீரிட்ட பீரங்கியும்  

எம்மூர் நாயும் கையாளும் சில முறை 

        பேயும் கையாளும்  . . . 

         

அரசன் முதல் ஆண்டி வரை ,

        குழந்தை முதல் குமரி வரை ,

குருதிகள் எத்தனை எம்மண்ணை 

        குளிப்பாட்டி கொஞ்சியிருக்கும் . . . 

எதற்கும் அஞ்சியவரும்  அல்ல  - நம்மை

     எவரும் மிஞ்சியவரும் அல்ல. . .  

எண்ணற்ற பெரியோரும் -  எதிர்த்து

       நின்ற இளைஞரும்

மாண்டு மடிந்த இம்மண் 

        மீண்டது எப்படி பாரீர் . . . 

போஸ் தலைமையில் போர்படை ஒன்று 

        கத்தி விடுத்தது, தோட்டா தொட்டது . . .

திரட்டிய படைகள் நடப்பதை கண்டு 

         காலனி படைகள் கண்தூக்கம் இழந்தது  . . . 

கல்லடி படாமல் கண்ணடி பட்டதோ ! 

    கண்ணாடி அணிந்தவன் காணாமல் போனான் . . . 

தலையின்றி படையும் படுத்தது போரில் 

    கடைசி முயற்சியும் முறிந்தது  போரில்  . . . 

இரு நூறு ஆண்டுகள் 

        இருளில் கழிந்தாலும்  . . .

இடுப்பில் துணியோடு 

       ஒளியாய் ஓர் ஆத்மா ! ! !

கத்தி பிடித்த கை  - கதர் 

    இராட்டை சுற்றிட 

ஓங்கிய கைகள் யாவும் 

     ஒடுங்கி போய் நின்றது  . . . .

அகிம்சை ஆயுதம் 

      மீட்டது மண்ணை, 

அடிமை உடைத்து  - உயிர்

      பெற்றது அன்னை  . .

பெற்ற சுதந்திரம் இருளில் என்றாலும்  

      ஏற்றம் என்றுமே விடியலை நோக்கி . . . 

பெற்றது அவர்களாயின் 

        போற்றிக் காப்பது நாமாகட்டும்  . . . . .

இனிய சுதந்திர தின நல்வாழ்த்துக்கள். . . 

விதி !

இரு வேறு கொடிகள் , இரு வேறு பூக்கள் 

இலைகளின் இடையே ஒன்றாய் மலர்ந்தது,

காற்றில் ஆடி, கவிதை பாடி 

மகரந்தம் தூவி, மழைகளில் நனைந்து என

மறக்க முடியா நாழிகைகள் பல 

குறிப்பேடுகளில் குடியேறியது . . . 

முகம் பதிந்து, முத்தம் பகிர்ந்து 

தோளில் சாய்ந்து தொடர்ந்தது காதல் . . .

ஆடி பாடி அகம் மகிழ்ந்து 

அணைத்துக்கொண்டு அரங்கேறியது காதல்  . . .

அத்தனையும் ஆசை படவில்லை ஆண்பூ 

உயிருக்கு மேலாக அதனுள் பெண்பூ . . . 

செழிப்பாய் ஒரு கொடி , சிவந்த பூ கொண்டு 

இரண்டின் இடையே புதிதாய் மலர்ந்தது ,

தாங்கிய கொடியின் தவிப்பினை போக்க 

சேர்ந்தது பெண் பூ, புது கொடி பூவோடு . . .

சொந்த காலில் நின்றாலும் ஆண் பூ 

செழிப்பின்றி போனதால் வாழ்வின்றி போனது  . . .

புது பூவோடு மனம்கோர்த்த பெண்பூ 

கவிதை பாடிட, மகிழ்ந்தது ஆண் பூ ,

காலை புணர்ந்தது , காற்றும் அடித்தது 

கண் விழித்த போது அங்கே 

கருகி கிடந்தது ஆண் பூ கீழே . . .

வெளிப்பாடு

இரண்டு வார்த்தைகள் தான் எல்லோரிடமும் ,

            சிலரிடம் அதன் மதிப்பு சில்லரையாய் ,

            சிலரிடம் அது நோட்டுகளாய் ,

            சிலரிடமோ அது வெறுமையாய் ,

            இன்னும் சிலரிடம் அது வெறுப்பாய் ,

மனதின் வெளிப்பாடை மறுக்காமல் ஏற்றுக்கொண்டு 

மறுபடியும் உச்சரிக்கிறான்

அந்த இரண்டு வார்த்தைகளை,.,.

 -- பிச்சைக்காரன். 

சிறப்பு

(Just for fun)

உனக்கு பயந்து பண முடிப்பில் 

           ஒளித்து வைத்த ரூபாய் நோட்டும் 

இன்று 

ஒரு வேளை உணவுக்காக 

                 உற்ற நேரத்தில் உதவுதடா ., 

உன்னைப்போலவே  .,

நண்பா  ! 

கண்கண்ட தெய்வம் !

                

கூட்ட நெரிசலில் ,

           கோவில் வாசலில்,

தோளில் தூக்கி 

           தொழுவதற்கு காண்பித்து,

தோள் வலி பொருத்து நின்று 

        தொலை தூர சிலையினை நீ காட்ட,

கண்முன் தெரியும் தெய்வம் - உனையன்றி

                  கற்சிலையை தொழுவேனோ இவ்வுலகில் ? 

அப்பா  !!!!!!!!!!!